31. janúar 2012

Bókasafnið opið á morgun, miðvikudag.

 Bókasafnið verður opið á morgun, miðvikudaginn 1. febrúar frá kl 20-22. Þeir sem eru með  bækur að láni frá safninu og búnir að lesa þær eru vinsamlegast beðnir um að skila þeim

30. janúar 2012

Kjósverjar endurvinna 33% úrgangs

Á árinu 2011 söfnuðust um 311 tonn af úrgangi í Kjósarhreppi í gegnum sorphirðu og endurvinnsluplanið við Meðalfell. Það gera um 1481 kg á íbúa að meðaltali sem er sambærilegt við landsmeðaltal. Um 33% þessa úrgangs fór til endurvinnslu eins og heyrúlluplast, hreint timbur, bylgjupappi og annar pappírsúrgangur, plastumbúðir o.fl. Á grafinu má sjá skiptingu þessa úrgangs og er úrgangur sem fór til endurvinnslu grænn að lit.

Um 67% úrgangsins var fargað með urðun með tilheyrandi kostnaði þar sem dýrara er fyrir sveitarfélagið að losna við blandaðan úrgang, grófan úrgang og blandað timbur auk þeirra umhverfisáhrifa sem því fylgja. Á grafinu er úrgangur sem er fargað rauður að lit. Slíkur úrgangur er urðaður og þar með glatast bæði næringarefni og hráefni úr hringrás náttúrunnar auk þess sem töluvert landssvæði þarf undir úrganginn, en hann er urðaður í Álfsnesi á urðunarstað SORPU. Þessu er öfugt farið hjá íbúum höfuðborgarsvæðisins en þar fóru aðeins um 38% úrgangsins til urðunar eins og fram kemur í frétt á heimasíðu SORPU.

Í Kjósarhreppi er þjónusta vegna sorphirðu sambærileg við það sem gerist á höfuðborgarsvæðinu en helsti munurinn liggur í lífrænni vinnslu. Metangas er framleitt úr lífrænum úrgangi sem jafngildir 25% endurvinnslutölunnar á höfuðborgarsvæðinu. Í Kjósarhreppi fellur til umtalsvert magn húsdýraúrgangs sem mætti nýta til metanframleiðslu ef hagstæð leið fyndist til þess. Metanvinnsla myndi einnig auka gæði áburðar úr húsdýraúrgangi samkvæmt rannsóknum sem hafa verið gerðar. Metanið er síðan hægt að nýta sem orkugjafa auk þess sem metan er ein af þeim lofttegundum sem valda auknum gróðurhúsaáhrifum í heiminum. Með því að brenna metani og umbreyta því þannig í koltvísýring er dregið úr áhrifum þess tuttuguogeittfalt auk þess sem það gæti sparað kostnað vegna rafmagnskaupa.

Það vekur athygli að pappírsúrgangur sem safnast til endurvinnslu í Kjósarhreppi er einungis 2% alls úrgangs en gera má ráð fyrir að pappírsúrgangur sé um 20% af heildarmagninu. Hér er tvímælalaust tækifæri til að leggja enn frekar af mörkum og Kjósverjar geta gert enn betur. Íbúar eru því hvattir til þess að flokka og skila bylgjupappa, drykkjarfernum, dagblöðum og tímaritum í þar til gerðan gám á endurvinnsluplani auk annars endurvinnanlegs úrgangs. Upplýsingar um hvernig skal flokka úrgang er að finna undir tenglinum flokkun úrgangs.

Með bestu kveðjum,

Umhverfisnefnd Kjósarhrepps

26. janúar 2012

Hundur fannst við Fossá

Hundur fannst við Fossá í Kjós  23. janúar, einn á ferð. Ef einhver kannast við að eiga hann eða veit um réttan eiganda vinsamlegast hafið samband við Guðmund í s:8672175 

Réttur eigandi er fundinn, en hundurinn hvarf frá Vogum á Vatnsleysuströnd deginum áður og er talið með ólíkindum hvað hann hefur náð að hlaupa á einum sólarhring.

26. janúar 2012

Kynning á lýsing á tillögu að skipulagsbreytingu á Aðalskipulagi Kjósarhrepps 2005-2017

Um er að ræða breytingu á hluta svæðis fyrir frístundabyggð í landi Eyrar í íbúðarsvæði.  Lýsing á tillögu að skipulagsbreytingu er sbr. 30 gr. skipulagslaga nr. 123/2010.  Breytingartillagan verður kynnt íbúum sveitarfélagsins og öðrum hagsmunaaðilum þann 26.  janúar og 2. feb. nk. með opnu húsi á skrifstofu Kjósarhrepps á milli kl. 13-18 að Ásgarði.  Lýsingin er jafnframt aðgengileg á heimasíðu sveitarfélagsins www.kjos.is.  Ábendingum við efni lýsingarinnar skal skila fyrir 16. feb. nk. á skrifstofu sveitarfélagsins eða á skipulag@kjos.is.

Hægt er að skoða breytingartillöguna undir Bygginarfulltrúi til vinstri á síðunni

Jón Eiríkur Guðmundsson

Skipulags- og byggingarfulltrúi

25. janúar 2012

Snjóþyngsli og umhleypingar í Kjós

Við íbúar í Kjós höfum verið heppin með veður undanfarna vetur, lítil snjóþyngsli,  en nú bregður öðru við, greinileg kominn tími að Kjósverjar fái að kynnast  alvöru "vetri konungi" þetta árið. 

Hér í sveit byrjaði að snjóa um 24. nóvember og hafa verið nánast stanslausir umhleypingar síðan, mest  þó bætt við snjóinn.  

Kjósarhreppur hefur staðið myndarlega að mokstri vega í sveitarfélaginu, en margir íbúar stunda vinnu frá heimili sínu, börn þurfa að komast í skóla, mjólkurbíllinn að komast til að ná í mjólkina, svo ekki sé minnst á póstinn.

25. janúar 2012

Þorrablót kvenfélagsins afstaðið

Þorrablót kvenfélags Kjósarhrepps var haldið í Félagsgarði sl laugardag og var húsfylli að venju. Skemmtiatriði voru heimagerð eins og alltaf áður og naut skemmtinefndin að þessu sinni stuðnings Gísla Einarssonar við gerð myndar sem sýnd var á blótinu og nefndist   "Fjandinn" frétta og þjóðlífsþáttur úr Kjós.   Hljómsveitin Loftskeytamenn sáu um tónlistina og Jóhann Sveinsson um matinn. Hér til hliðar má sjá skemmtinefndina ásamt Bjössa úr Greifunum, en stofnaður var að þessu tilefni sönghópurinn "Vinkonur Bjössa"

17. janúar 2012

Plastgámar losaðir á laugardaginn

 Rúlluplastgámarnir verða losaðir á laugardaginn, 21. janúar.

Mikilvægt er að hafa aðgengi að þeim gott, en ef  hindranir eru snjór eða svell, þarf að færa þá til annars er hætta á að þeir verða ekki losaðir.

17. janúar 2012

Firðskeyti

Firðskeyti er orð sem kemur sjaldan við sögu hjá lögreglu en þó gerðist það í síðustu viku. Þannig var að tveir gámar féllu af flutningaskipi og rak þá á fjöru í Kjósarhreppi. Eigandi jarðarinnar lét lögreglu vita í samæri við lög um skipströnd og vogrek frá árinu 1926. Lögreglustjóri gerði svo ráðherra grein fyrir málinu, og hið sama stóð til að gera gagnvart eigendum gámanna, í samræmi við sömu lög eða eins og segir í I. kafla um skipströnd, 1. gr.;

Hver, sem þess verður var, að hafskip sé í hættu statt við land eða strandað, eða að góss úr því reki á land, er skyldur að gera allt, sem í hans valdi stendur, til þess að bjarga mönnum og góssi, enda skal hann tafarlaust skýra hreppstjóra, eða lögreglustjóra, ef auðveldara er að ná til hans, frá atburðum með firðskeyti eða símtali, ef þess er kostur, en ella með skyndiboða. Hreppstjóri skal með sama hætti skýra lögreglustjóra frá skipreika. Lögreglustjóri skýrir síðan dómsmálaráðherra, svo og eigendum og vátryggjendum skips og farms eða umboðsmönnum þeirra, ef vitað er, hverjir eru, frá því, hvernig komið er, með firðskeyti, ef þess er kostur, en ella með næstu póstferð. Dómsmálaráðuneytið skal svo, jafnskjótt sem unnt er, tilkynna skipreikann fyrirsvarsmanni þess ríkis, sem skip er frá.

Reyndar kaus lögreglustjóri að koma tilkynningunni á framfæri með tölvupósti en slíkt þykir hefðbundið á 21. öldinni. Orðið firðskeyti hefur annars þá merkingu, eftir því sem skrifari veit best, að það stendur fyrir nokkurskonar skeyti sem sent er með hjálp síma eða telex og er skrifað út hjá móttakanda.

Að síðustu má geta þess að finnandi gámanna í Kjósarhreppi var nýbúinn að ræða það við sveitunga sinn að sennilega þyrftu þeir að útvega sér gáma í tengslum við nýtt reykhús sem þeir eru með í bígerð. Hinn sami hafði á orði að sennilega myndi nú eitthvað reka á fjörur þeirra og reyndist hann sannspár. Þrátt fyrir fundinn verða mennirnir þó að öllum líkindum að finna sér aðra gáma undir starfsemina (Frétt tekin af vef Lögreglunnar)

17. janúar 2012

Fjórir dagar í þorrablót

 Aðeins fjórir dagar eru nú í þorrablótið og auglýsingin komin í hús. Núna er bara að finna sparifötin og hefjast handa við pressun.

17. janúar 2012

Járninganámskeið

 Adam stendur fyrir járninganámskeiði sunnudaginn 12. Febrúar. Námskeiðið er haldið i Blönduholti. Kennari er járningameistarinn Sigurður Torfi Sigurðsson. Kennsla ber bæði bókleg og verkleg, Þátttakendur mega koma með hesta með sér. Námskeiðið hefst kl. 10 og lýkur seinni part dagsins. Gjaldið er kr. 8000 (m.v. nægan fjölda þátttakenda). Þetta er frábært tækifæri til að læra af meistaranum.
Þátttaendur tilkynni þátttöku í síðasta lagi 21 janúar á netfangið: bjossi@icelandic-horses.is eða í s. 895-7745.
Hestamannafélagið Adam.

16. janúar 2012

Fimm dagar í Þorrablótið

Aðeins fimm dagar eru nú  í hið árlega þorrablót kvenfélagsins sem að vengju hefur veðið haldið fyrsta laugardaginn í þorra. Skemmtinefndin er að mestu klár með sitt verkefni en eitthvað hefur PÓSTURINN klikkað á að bera út auglýsinguna fyrir blótið og er hér með lýst eftir henni.

12. janúar 2012

Níu dagar í þorrablót

Níu dagar eru nú í þorrablót kvenfélagsins  og veðurspáin er góð, en norska veðurstofan spáir sól og blíðu þann 21.

5. janúar 2012

Þrettándabrenna við Félagsgarð

Haldin verður hin árlega þrettándabrenna við Félagsgarð í Kjós á morgun en veðurspáin er all góð.  Fólk er hvatt til að mæta við brennuna og taka börnin með. Kveikt verður í brennunni kl 20:30 og flugeldasýning hefst á sama tíma. Jólasveinarnir eru nú flestir á leið til síns heima enda þrettándi dagur jóla. Einn hefur lofað koma við á leið sinni heim og er aldrei  að vita nema hann hafi einhverja restar handa börnunum í pokahornum sínum.

Kvenfélagið mun bjóða uppá heitt kákó og meðlæti við hæfi 

4. janúar 2012

Brenna á föstudaginn ef veður verður gott

Brenna verður við Félagsgarð á föstudagskvöldið 6. janúar ef veður verður gott.

Nánari upplýsingar á vefnum þegar nær dregur.

4. janúar 2012

Frá Aðalfundi SF.Kjós 2011

Aðalfundur SF.Kjós  2011 var haldinn í Ásgarði  þann 7 desember s.l.

Að afloknum hefðbundnum aðalfundarstörfum þar sem stjórn félagsins var endurkjörin, en hana skipa Guðmundur Davíðsson, María D. Þórarinsdóttir og Hreiðar Grímsson, tóku gestir fundarins til máls fyrst Sigurgeir Sindri, formaður Landssamtaka Sauðfjárbænda, hann kynnti fyrir okkur öll þau málefni sem Landssamtökin eru að kljást við þessa dagana  og Árni B. Bragason, frá  Bú-Vest, kom og upplýsti um  framgang kynbótastarfsins  í félaginu okkar.   Góðar umræður urðu á fundinum  um hin ýmsu mál er snúa að sauðfjárræktinni. 

Fundurinn sendi frá sér  2 ályktanir.

1.    Sent  MAST, LS og Ólafi Dýrmundssyni.

Aðalfundur SF. Kjós haldinn í Ásgarði 7. des. 2011 samþykkir að beina því til Mast að endurskoða reglur um ómerkt fé sem kemur til slátrunar,eða leita eftir undanþágu frá þessu ákvæði,eða finna einhverja leið t.d. með útgáfu sérstakra merkja sem sveitarfélög og upprekstrarfélög geta fengið úthlutað frá Mast, svo hægt sé að nýta þessa gripi á eðlilegan hátt.

Ótækt er að ómerkt fé og annað  óskilafé sé sent til urðunar frá sláturhúsum í stað þess að andvirði þess renni til sameiginlegra sjóða eins og verið hefur, enda verða upprekstrarfélög/ sveitarfélög fyrir kostnaði vegna þessa fjár.

Hætta er á að fé þessu verði ekki skilað í sláturhús eins og verið hefur heldur verði farið að ráðstafa því með öðrum hætti.

2.     Sent Tölvudeild BÍ og  LS.                                                     

Aðalfundur SF.Kjós haldinn í Ásgarði þann 7.12.2011, samþykkir að skora á tölvudeild BÍ, þ.e. forritara og umsjónarmenn Fjárvíss, að athuga hvort ekki væri hægt að setja upp pörunarforrit í fjárvís, samskonar og er í Worldfeng, þar sem hægt er að para saman einstaklinga og jafnvel hópa og sjá skyldleika þeirra (%), mögulega liti, og kynbótaspá.

Stjórn SF.Kjós.

3. janúar 2012

ATH. losun á fimmtudaginn 5. janúar

Sorptunnur verða samkvæmt breytingu tæmdar á morgun, fimmtudaginn 5. janúar. Íbúðarhúsaeigendur eru vinsamlegst beðnir um að hafa gott aðgengi að þeim, annars er hætta á að þær verði ekki tæmdar.

Bílstjórinn hafði orð á því eftir síðustu losun að aðgengi hefði verið misgott hjá íbúum  og  ítrekar nú að það verði haft í lagi.

30. desember 2011

Jólatrésskemtuninni frestað

Jólatrésskemtuninni sem ákveðið var að halda í Félagsgarði í dag kl 16 er frestað vegna ótryggs veðurútlits. Skoðað verður hvort hægt væri að halda hana að viku liðinni. Nánar auglýst síðar.

28. desember 2011

Jólatrésskemmtun á föstudaginn 30. desember kl 16

 Jólatrésskemmtun verður haldin í Félagsgarði Kjós föstudaginn 30. desember 2011 kl 16 í boði Kjósarhrepps og kvenfélags Kjósarhrepps. Allir eru velkomnir.

26. desember 2011

Skrifstofur Kjósarhrepps lokaðar á milli jóla og nýárs

Skrifstofur Kjósarhrepps verða lokaðar á milli jóla og nýárs. Opna aftur þriðjudaginn 3. janúar 2012.

20. desember 2011

Skötuveislan á föstudaginn 23. desember í Félagsgarði kl 13

Minni íbúa á að panta þarf í veisluna tímanlega, vegna aðfangaöflunar.

Á boðstólum verður tindabikkja vel kæst að vestan, skata, saltfiskur, sérbakað rúgbrauð að hætti Steinunnar á Meðalfelli og annað ágætt meðlæti.

Aðeins verður boðið upp á vatn til að renna skötunni niður með. Gestir er því beðnir um að hafa drykkjarföng með ef þeir ef þeir kjósa að drekka eitthvað annað en blákalt íslenskt vatnið.

20. desember 2011

Sorphreinsun

Sorptunnur verða samkvæmt áætlun tæmdar á föstudaginn 23. desember. Íbúðarhúsaeigendur eru vinsamlegst beðnir um að hafa gott aðgengi að þeim, annars er hætta á að þær verði ekki tæmdar.

19. desember 2011

Bókakynning á bókasafnskvöldi í Ásgarði miðvikudagskvöld 21. desember kl 20.

Bókasafnið verður opið miðvikudagskvöldið kl 20-22. Þá koma og kynna nýjar bækur sínar þeir Bjarni Guðmundsson á Hvanneyri og Sigurður Sigurðsson dýralæknir.

Bjarni segir í bók sinni sögur um Farmall-dráttarvélar og fleiri tæki frá International Harvester og frá hlut þeirra í framvindu landbúnaðar og þjóðlífs á Íslandi og heldur þar með áfram að skrá þróun vélvæðingar íslenskra sveita á síðustu öld með þeim einstaka hætti sem menn kynntust í bók hans um Ferguson dráttarvélarnar.

Bók Sigurðar er ævisaga og ber einfaldlega heitið Sigurður dýralæknir. Þar segir Sigurður á sinn skemmtilega hátt frá mönnum, skepnum og málefnum.

Boðið verður upp á kaffi og meðlæti og jólastemmingu. Kjósarstofa verður opin þar sem verður hægt að versla bækur og handverk og skoða ljósmyndasýningu.

15. desember 2011

Sauðfjárbændur athugið.

Samkvæmt reglugerð um garnaveiki og varnir gegn henni frá 21. september

2011 er eiganda/umráðamanni sauðfjár og/eða geita á svæðum sem tilgreind eru í sem garnaveikisvæði samkvæmt viðauka reglugerðarinnar skylt að láta bólusetja öll ásetningslömb/kið til varnar garnaveiki á tímabilinu 15.

ágúst til 31. desember ár hvert eins og verið hefur. Þeir bæir þar sem eigandi/umráðamaður sauðfjár hefur ekki sinnt skyldu til bólusetningar samkvæmt 5. gr reglugerðarinnar verða skilgreindir sem garnaveikibæir en þetta ákvæði er nýtt inni í garnaveikireglugerðinni nú.

Reglugerðina má lesa í heild sinni hér:

http://stjornartidindi.is/Advert.aspx?ID=8288f8b3-0237-4b82-86f0-2ef177c4fdc2

Bændur er hvattir til að gera allt sem í þeirra valdi stendur til að fá fé sitt bólusett fyrir tilskyldan tíma. Þeim sem hafa gert ítrekaðar tilraunir til að fá féð bólusett og hefur ekki orðið ágengt er bent á að koma þeim upplýsingum til héraðsdýralæknis í Vesturumdæmi á netfangið flora.liste@mast.is.

Bestu kveðjur frá BV

15. desember 2011

Fjárhagsáætlun Kjósarhrepps fyrir árið 2012, samþykkt.

Fjárhagsáætlun Kjósarhrepps fyrir árið 2012 var samþykkr á hreppsnefndarfundi sl. þriðjudag og má sjá hana  undir flipanum " Skýrslur og útgefið efni" hér á síðunni.  Íbúar eru hvattir til að kynna sér hana vel.

Innheimta fasteignagjalda

Að gefnu tilefni er vert að minna á að hertar hafa verið innheimtur á fasteignagjöldum sem greiða á til Kjósarhrepps, en hreppsnefnd samþykkti á fundi sínum 20. október sl. að senda fasteignagjöld í vanskilum í innheimtu hjá lögmanni. Sú innheimta er þegar farin af stað og ætti ekki að koma neinum á óvart, þar sem  nokkur viðvörunarbréf hafa þegar verið send og þeir sem ekki hafa sýnt neinn greiðsluvilja mega búast við hertari aðgerðum sem fylgir aukinn kostnaður.  Gott er þá að bregðast skjótt við.

14. desember 2011

Úrslit frá folaldasýningu Adams.

Folaldasýningin hjá Adam gekk vel, þrátt fyrir stríðni veðurguðanna. Ræktunin er á réttri leið í Kjósinni og mikið um falleg folöld, og dómurum vandi á höndum. Það vildi vel til að í dómarasætunum voru engir meðaljónar, en í þeim sátu stórræktandinn á Einhamri; Hjörleifur Jónsson og tamningar-og reiðsnillingurinn; Benedikt Þór Kristjánsson á Akranesi. Þakkar Adam þeim fyrir mjög gott starf og stuðninginn.  Eftir að búið var að dæma öll folöldin var „skærasta stjarnan“ í eigu Adamsfélaga útnefnd. Þann titil hlaut hin gullfallega Aska frá Þúfu í Kjós. Svo skemmtilega vill til að í ættum margra folaldanna má finna Adam frá Meðalfelli. Myndir frá sýningunni fá sjá á Facebook, undir hestamannafélagið Adam.

Úrslit urðu eftirfarandi:

Merar:

1.      Aska frá Þúfu í Kjós.  F: Korgur frá Ingólfshvoli./Líney frá Þúfu í Kjós

2.      Orsök frá Miðdal. F: Fróði frá Staðartungu./ M:Sín frá Miðdal.

3.      Dögun frá Þorláksstöðum. F: Valur frá Efra-Langholti./M:Vorsól f. Þorláksst.

4.      Prinsessa frá Þúfu í Kjós. F: Þröstur frá Hvammi./M: Drottning f. Þúfu í Kjós.

5.      Væta frá Hlíðarási. F: Dofri frá Steinnesi/M:Stjörnudís f. Kjarnholtum.

Hestar:

1.      Skugga-Sveinn  frá Þjóðólfshaga. F: Álfur frá Selfossi/M: Pyttla f. Flekkudal.

2.      Prins Valíant frá Þúfu í Kjós. F: Sólbjartur frá Flekkudal/M. Rakel frá Hnjúki.

3.      Fjaðrandi  frá  Þorláksstöðum. F: Svalur frá Þorláksstöðum/Krummatá f.Þorláksst.

4.       Loftfari frá Þúfu í Kjós. F: Gári frá Auðsholtshjáleigu/Brynja frá Feti

5.      Esjar frá Flekkudal. F: Sólbjartur frá Flekkudal./M: Björk frá Vindási.

Adam stefnir svo á að halda vetrarleika á ís í vetur, vatnið „okkar“ Meðalfellsvatn, er frosið, en það vantar bara  meira af hrossum á járn!  Svo nú er um að gera að negla undir gæðingana og græja sig fyrir alvöru ístölt!“ segir í frétt frá stjórn Adams

9. desember 2011

Met þátttaka í folaldasýningu Adams - allir velkomnir.

Það stefnir í met þátttöku í folaldasýningu Adams. Nú þegar hafa verið skráð 22 folöld, og vitað er af einhverjum sem eiga eftir að skrá, þó skráningarfresti sé formlega lokið.

Við hvetjum kjósverja og annað gott fólk að líta við og fylgjst með skemmtilegri sýningu. Heitt á könnunni, piparkökur og fjör.

Spennan er í hámarki, sumir munu ekki getað sofið fyrir spenningi, aðrir gera sér engar vonir og eru með af tryggð við félagið, he, he.

Sjáumst í Boganum kl. 13 á sunnudaginn- næg bílastæði.

Stjórn Adams.

7. desember 2011

Aðalfundur Hvalfjarðarklasans í Kjósarstofu

Miðvikudaginn 14.desember kl. 20.00 fer fram aðalfundur Hvalfjarðarklasans í Ásgarði í Kjós - Kjósarstofa.

Dagskrá:

1.     Skýrsla stjórnar og verkefnisstjóra.

2.     Rekstraryfirlit.

3.     Inntaka nýrra félaga skv. samþykktum félagsins.

4.     Stjórnarkjör.

5.     Kosning skoðunarmanna reikninga.

6.     Tillaga stjórnar um árgjald, sbr. 9.grein samþykkta félagsins.

7.     Önnur mál

Ferðaþjónustuaðilar í Hvalfirði eru hvattir til þess að mæta.

Stjórn Hvalfjarðarklasans

6. desember 2011

Dagskrá vikunnar

Hreppsnefndarfundur á fimmtudaginn í Ásgarði kl 13

Aðalfundur SFKjós verður haldinn í Ásgarði á morgun miðvikudaginn 7. des kl 20:00. Gestir fundarins verða þeir Sigurgeir Sindri formaður LS og Árni Braga frá Bú-Vest

Bókasafnið verður opið á morgun 7. desember frá kl 15-18.

Þeir sem eru með nýjar bækur eru vinsamlegast beðnir um að skila þeim.

Jólafundur kvenfélagsins í kvöld

6. desember 2011

Tilkynning frá Adam

Fræðslufundur á fimmtudaginn – Folaldasýning á sunnudaginn.

Hestamannafélagið Adam er komið með vefsíðu á fésbókinni-facebook. Yngsti meðlimur stjórnar félagsins; hún Ólöf Ósk í Miðdal,  stakk upp á tiltækinu og tók að sér að koma upp síðu fyrir félagið.  Þar mun félagið koma fréttum og tilkynningum á framfæri. Auk þess hvetjum við félagsmenn og aðra til að nýta sér þennan samskiptamöguleika félagsmanna á milli. 

Minnum  á fræðslufundinn með Ingimari Sveinssyni, fyrrv. bónda og kennara,  á fimmtudagskvöldið í Ásgarði, kl 20. Hann verður með magnað erindi og svarar svo fyrirspurnum.  Bændur, hestamenn og annað áhugafólk; ekki missa af þessu einstaka tækifæri. Gjald kr. 1500.

Hin árlega folaldasýning félagsins verður á sunnudaginn kl. 13, að Þúfu. Nú er um að gera og vera með. Munið að skrá folöld í síðasta lagi á fimmtudaginn.  Senda þarf IS-númer folalds eða: nafn, uppruna, lit, nafn ræktanda, móður og föður. Gjald kr. 1500 á folald. Senda má skráningu á bjossi@icelandic-horses.is eða í s: 895-7745.  Það verður feikna fjör á sýningunni. Hvetjum fólk til að koma og fylgjast með. Heitt á könnunni, piparkökur og fjör.

Sjáumst hress.

Stjórn Adams

5. desember 2011

Ný þjónusta í Kjósinni- Þjónusta vegna öryggiskerfa.- Útkallsþjónusta.

Mikil umræða hefur verið um öryggismál í Kjósinni á undanförnu, enda ekki að ástæðulausu. Fólk hefur velt fyrir sér með hvaða hætti mætti sporna gegn þeirri óheilla þróun sem verið hefur. Að koma að eign sinni eftir innbrot og eða skemmdarverk er hreint ömurleg upplifun.  Öryggiskerfi, þar með talin GSM-tengd öryggiskerfi,  eru ein besta forvörnin gegn innbrotum, skemmdarverkum,  eldi  og margvíslegum ófögnuði.  

Fasteignaeigendur í Kjós hafa fram til þessa ekki átt þess kost að nýta sér slík kerfi sem skyldi, þar sem þjónusta við kerfin hefur ekki verið fyrir hendi.   

Við á Þúfu í Kjós, höfum ákveðið að bjóða upp á þjónustu til að sinna útköllum frá öryggiskerfum. Þannig verða öryggiskerfi raunhæfur kostur fyrir umráðaaðila fasteigna í Kjósinni. Viðbragðstími við boðum frá öryggiskerfunum ætti ekki að vera meiri en á höfuðborgarsvæðinu.  Stuttur viðbragðstími er grundvallaratriði, svo kerfin komi að fullum notum.

Við erum með áratuga reynslu á sviði öryggisgæslu, og leyfi á því sviði. Veitum einnig ráðgjöf í þessum efnum og brunavörnum.

Þeir aðilar sem hafa áhuga á að kynna sér þjónustuna geta haft samband með tölvupósti á: oryggi.kjos@gmail.com eða í síma: 895-7745.

Björn Ólafsson.

Guðríður Gunnarsdóttir.

Þúfu í Kjós.

1. desember 2011

Jólaaðfangamarkaður í Félagsgarði á laugardag

Hinn árlegi jólaaðfangamarkaður Kjósverja verður haldinn í Félagsgarði kl 13-17 laugardaginn 3. desember.

Í boði verða matvæli beint frá býli, handverk og önnur gjafavara.

Föndur verður fyrir börnin og kaffisala á vegum Kvenfélags Kjósarhrepps.

Verið velkomin í jólastemmningu í Félagsgarð Kjós.

1. desember 2011

Opinn fundur um íbúamál fellur niður

 Opinn fundur sem átti að halda í kvöld í Ásgarði fellur niður vegna lasleika og ótryggs veðurútlits.

29. nóvember 2011

Skipulagsmál í uppnámi á Grundartanga

Hvalfjarðarsveit hefur afturkallað auglýsingu um gildistöku á deiliskipulagi á Grundartanga-vestursvæði. Unnið hefur verið við að breyta skipulagi á fyrrgreindu svæði sem liggur vestan við núverandi stóriðjusvæði. Breytingin felur í sér að athafnasvæði er breytt í iðnaðarsvæði svo komi megi þar fyrir nýjum verksmiðjum.

Aðalskipulagsbreyting hefur tekið gild en stjórnsýslukæra vegna gildistökunnar er til meðferðar hjá Umhverfisráðuneytinu. Á kynningartíma tillögu um aðalskipulagsbreyting bárust 53 athugasemdir. Til engra þeirra var tekið tillit við endanlegt skipulag.

Hvalfjarðarsveit auglýsti gildistöku deiliskipulags á umræddu svæði án þess að senda það áður til Skipulagsstofnunar til lögbundinnar yfirferðar auk annarra afmarka sem leiddi til þess að afturkalla þurfti deiliskipulagið. Samkvæmt nýjum skipulagslögum eru ströng tímamörk um ferlis skipulagsbreytinga. Samkvæmt þeim var frestur Hvalfjarðarsveitar til að birta auglýsingu um gildistöku deiliskipulags þegar liðinn þegar auglýsing var birt og er því ekki ljóst hver framvindan verður.

 sh

29. nóvember 2011

Opinn íbúafundur í Kjósarhreppi

Opinn íbúafundur í Kjósarhreppi verður haldinn í Ásgarði 1. desember og hefst kl 20.30.

Farið verður yfir drög að fjárhagsáætlun sveitarfélagsins fyrir árið 2012.

Íbúar eru hvattir til að mæta og ræða fjárhagsáætlunina.

Á fundinum verða einnig kynntar hugmyndir undirbúningshóps að nágrannavörslu í sveitarfélaginu.

Forvarnarfulltrúi tryggingarfélags verður á staðnum. 

28. nóvember 2011

Fundað um öryggismál í Kaffi Kjós

Starfshópur um öryggismál hefur haldið tvo fundi um öryggismál að undanförnu á Kaffi Kjós. Þar hafa mætt Guðmundur Davíðsson oddviti, Hermann Ingólfsson og Birna Einarsdóttir eigendur Kaffi Kjósar, Einar Tönsberg formaður sumarhúsafélagsins Hálsnesi, Karl Arthúrsson formaður sumarhúsafélagsins Norðurnesi, Páll Björgvinsson formaður sumarhúsafélagsins við Meðalfellsvatn og Ólafur J. Engilbertsson Borgarhóli.

 Á fundunum var rætt um að efla nágrannavörslu í Kjósinni með kynningu á forvörnum og viðbragðsáætlunum og að gera síma- og netfangaskrá fyrir hvert svæði þannig að nýtist í nágrannavörslu. Rætt var um að gera úttekt á því hvaða þættir í bættu öryggi gætu nýst öllum fasteignaeigendum í sveitarfélaginu,  farandgæsla, myndavélar eða önnur úrræði.

Starfshópurinn hefur mótað eftirfarandi ályktun til að leggja fyrir íbúafund sem ráðgerður er þann 1. desember:

Í tilefni af tíðum innbrotum og hræðilegu dýraníði hér í Kjós skorar íbúafundur á sveitarstjórn Kjósarhrepps að bregðast við þessum óhæfuverkum með því að tryggja eins og kostur er öryggi og öryggistilfinningu þeirra sem búa og dvelja í Kjósinni.

28. nóvember 2011

Folaldasýningu frestað um viku.

Folaldasýningin sem átti að vera þann 4 desember, er frestað til laugardagsins 10. desember.

Sýningin hefst stundvíslega kl.13. í Boganum á Þúfu. 

Skráningar sendist á bjossi@icelandic-horses.is eða í s: 895-7745, ekki seinna en 8. desember. 

Nóg er að senda IS-númer folalds við skráningu. Ef ekki er búið að skrá folald í WF þá þurfa eftirfarandi upplýsingar að koma fram: Nafn folalds - nöfn og uppruni föður og móður - litur- nafn ræktanda og eiganda.

Skráningargjald er kr. 1500 fyrir hvert folald og greiðist á staðnum í seðlum.

Fimm efstu folöld í hvorum flokki verðlaunuð, sem og athyglisverðasta folaldið í eigu Adamsfélaga.

Sýningin er öllum opin. Það verður jólakjósarstemming og bara gaman.

Stjórn Adams

28. nóvember 2011

Ferðaþjónusta við Hvalfjörð

Opinn fundur ferðaþjónustuaðila og áhugafólks við Hvalfjörð, haldinn í Hótel Glym þriðjudaginn 29 nóvember kl: 9:00-15:00.

9:00- 9:15 morgunkaffi

9:15  Sameiginleg verkefni og samstarf ferðaþjónustunnar í Kjós og Hvalfjarðarsveit

Rósa Björk Halldórsdóttir, framkvæmdastjóri Markaðsstofu Vesturlands  Spurningar/svör (/20 mín)

9:35  Hvalfjarðarsamstarf ,undirstaða, fjarmagn og stjórnun

Þórdís G. Artúrsdóttir, leiðsögumaður og verkefnastjóri

Spurningar/svör (20 mín)

10:00 Styrkir SSV til ferðamála

Torfi Jóhannsson verkefnastjóri Vaxtarsamnings Vesturlands (15 mín)

10:15 Verkefni kynnt og skipt í hópa

 Hópaverkefni – grunnur að samstarfi 

 1.      Sérstaða svæðisins, sameiginleg markmið,(hvað höfum við að bjóða, hvaða takmark höfum við, hvaða leiðir förum við til að því takmarki

 2.      Sameiginleg upplýsingamiðlun (vefsíða, prentað kynningarefni, auglýsingar ofl.

11:30 Niðurstöður kynntar

12:00 – 12:30 hádegishlé; súpa og brauð að hætti Hótel Glyms á vægu verði

12:30 Hópaverkefni – samstarf í framkvæmd

    1. grunneiningar samstarfsins – Hvalfjarðarklasinn, Kjósarstofa, aðkoma ferðaþjónustuaðila

    2. fjármögnun, aðkoma ferðaþjónustuaðila, styrkir frá hverjum, aðkoma sveitarfélaganna

    3. framkvæmdanefnd ?  Framkvæmdastjóri ?

13:30   Niðurstöður kynntar, næstu skref

26. nóvember 2011

Fræðslukvöld með Ingimari Sveinssyni, kennara og fræðara.

Hestamannafélagið Adam stendur fyrir fræðlufundi með hinum kunna fræðimanni; Ingimari Sveinssyni, fimmtudagskvöldið 8. desember, í Ásgarði kl. 20. 

Ingimar stundaði háskólanám í búvísindum í Bandaríkjunum og er fyrrverandi bóndi. Hann hefur einnig stundað kennslu við LBH að Hvanneyri. Ingimar er mjög vinsæll fyrirlesari og mikilsvirtur fræðimaður.

Við hvetjum Kjósverja, bændur, hestamenn og sérstaklega yngri kynslóðina að mæta á fundinn.

Ingimar mun halda erindi og síðan svara fyrirspurnum  fundargesta. Hann mun m.a. fjalla um fóðrun og hin ýmsu bætiefni.  Þess má geta að nýlega kom út bókin „Hrossafræði Ingimars“, sem hefur hlotið mjög lofsamlega dóma. 

Aðgangseyrir er kr. 1500. 

Tökum fimmtudagskvöldið þann 8. desember frá. Þetta er einstakt tækifæri fyrir bændur og hestaáhugafólk.  Meðfylgjandi mynd var tekin af Ingimari þegar hann var heiðraður nýlega af Hrossaræktarsambandi Vesturlands.

Stjórn Adams.

26. nóvember 2011

Jól í Kaffi Kjós

Opið verður um helgar á aðventunni í Kaffi Kjós kl. 12  - 17

Dags. 26 og 27 nóvember,  3 og 4 desember,  10 og 11 desember, 

17 og 18 desember.

Alltaf heitt á könnunni

Kveðjur Hermann og Birna

21. nóvember 2011

Kröftugur aðalfundur Umhverfisvaktarinnar

Fyrsti aðalfundur Umhverfisvaktarinnar í Hvalfirði var haldinn í Kaffi Kjós 15. Nóvember sl. Ragnheiður Þorgrímsdóttir formaður gerði grein fyrir helstu verkefnum á fyrsta starfsári félagsins. Vegna fyrirhugaðar stækkunar iðnaðarsvæðisins á Grundartanga og fjölgunar á mengandi iðjuverum hefur augu vaktarinnar fyrst og fremst beinst að þeim þætti umhverfismála í Hvalfirði. Félagið heldur úti vefsíðunni umhverfisvaktin.is. Eftir að ályktanir fundarins voru sendar út í síðustu viku var ráðist að síðunni af hakkara og hefur síðan verið óvirk, en nú hefur tekist að endurheimta uppsetninguna.

Fundurinn samþykkti fjórar ályktanir. Ein varðaði neysluvatnsmál á Akranesi og skorða var á bæjaryfirvöld að vera á verði þar sem um yfirborðsvatn er um að ræða. Skorað var á ríkisstjórnina að svara þeirri spurningu: hversu langt sé ætlunin að ganga á rétt íbúa til  hreins umhverfis, með mengandi iðnaði í Hvalfirði og hvort ekki sé hægt að beina mengandi iðnaði til þeirra landshluta sem hann vilja fá. Þá beinir fundurinn því til Umhverfisráðherra að flytja ábyrgð á umhverfisvöktun iðjuveranna frá iðjuverunum sjálfum til opinberar stofnunar.

Fundurinn skorar jafnframt á sveitarstjórn Hvalfjarðarsveitar að falla frá frekari stækkun iðnaðarsvæðisins á Grundartanga og bendir á þá óhugnanlegu staðreynd að innan þynningarsvæðis fyrir flúors og brennistein er  starfrækt fóðurframleiðsla fyrir landbúnaðarframleiðslu og öll aukning á mengandi efnum í kælilofti fóðurstöðvarinnar stefni rekstri hennar í enn frekara óefni.

Ályktanir fundarins má nálgast HÉR

18. nóvember 2011

Mikil dagskrá framundan hjá Adam – Folaldasýning 4. desember-skráning.

Folaldasýning:
Hestamannafélagið Adam mun standa að sinni árlegu folaldasýningu kl. 13:30 þann 4. desember í Boganum að Þúfu. Verðlaunuð verða 5 efstu folöld í hvorum flokki, auk glæsilegasta folaldsins í eigu Adamsfélaga. Skráningargjald kr. 1500 fyrir hvert folald. Þátttakendur eru beðnir um að hafa skráningargjald tiltækt á staðnum.  Skrá þarf folöldin í síðasta lagi 2. desember.  Skráningar sendast  á bjossi@icelandic-horses.is    þar sem fram kemur IS númer folalds. Ef ekki er búið að skrá folald þurfa upplýsingar um nafn föður, móður, lit og uppruna að koma fram.  Þeir sem ekki hafa möguleika á að senda tölvupóst geta hringt inn skráningu í síma 895-7745. Dómari verður einn stærsti kynbótadómari landsins; Þorvaldur Kristjánsson.
Heitt verður á könnunni , piparkökur og  gaman.  Áhorfendur meira en velkomnir.

Dagskrá vetrarins er að öðru leyti að taka á sig mynd.  Fyrirhugað er að halda fræðslufund í desember, og verður hann auglýstur síðar.
Reiðnámskeið: Stjórnin hefur áhuga á að setja af stað reiðnámskeið. Eru aðilar sem hafa áhuga að taka þátt eða eru með börn sem vilja komast á námskeið, beðnir um að hafa samband. Námskeiðið færi væntanlega fram um helgar. Hægt er að hafa samband við hvern sem er í stjórn Adams. (Bjössa á Þúfu, Sigga í Flekkudal, Óðinn á Klörustöðum, Orra á Morastöðum eða Ólöfu Ósk í Miðdal).

Opið í Boganum:  Ákveðið hefur verið að hafa Bogann á Þúfu opinn fyrir félagsmenn Adams á laugardögum og sunnudögum milli frá kl. 10-13. Einnig er hægt að panta aðra tíma. Gjald fyrir hverja heimsókn er kr. 300 fyrir hvern knapa á meðan bjart er, en kr. 500 ef nota þarf lýsingu. Gjaldið greiðist á staðnum.

Vetrarleikar ofl:   Bogatölt 25. febrúar – Vetrarleikar 17.mars –Hópreið 21.apríl –Firmakeppni 1. maí.

Adamsfélagar og aðrir hestamenn, merkið þessa viðburð inn á dagatalið og takið þá frá!
Svo er bara að þjálfa stíft fyrir komandi landsmót, en úrtaka Adams verður auglýst síðar.

Kjósverjar og annað skemmtilegt fólk; höfum gaman, saman.
Stjórn Adams.

p.s. hvetjum þá örfáu hestamenn í Kjós sem ekki eru félagar að ganga í félagið.

15. nóvember 2011

Viðgerðir á brúnni yfir Laxá

Viðgerðir hófust á brúnni yfir Laxá í Kjós í síðustu viku og munu þær standa fram í miðja næstu viku. Kominn var tími á verkið en nú verður skipt um timbur í hluta af bæði neðra og efra gólfi. Síðan verður netið endurnýjað eftir þörfum. Vegfarendur eru beðnir að sýna þolinmæði og kurteysi, en tafir geti orðið á að komast yfir brúna 

14. nóvember 2011

Félagsgarður

Nú hafa menn Jóns Júlíusar, Garðmenn lokið við að helluleggja við Félagsgarð.

Kvenfélag Kjósarhrepps ákvað á dögunum að gefa plönturnar í beðin. Nokkrar komu svo galvaskar á sunnudaginn og gróðursettu heilmikið af fallegum og fjölbreyttum plöntum ásamt hönnuði verksins. En hún sést hér á kafi í rósarunna að leggja lokahönd á verkið ásamt föður sínum. Sjón er sögu ríkari.

10. nóvember 2011

Jólaaðfangamarkaður í Félagsgarði laugardaginn 3. desember

Hinn árlegi jólaaðfangamarkaður Kjósverja verður í Félagsgarði laugardaginn 3. desember.

Markaðurinn verður opinn frá kl.13:00 -17:00 laugardaginn 3. desember og verður húsið opnað kl.10:30 til undirbúnings. Áhersla er lögð á að heimamenn verði þar með vörur sínar á boðstólum og eru þeir beðnir um að taka frá borð fyrir 21. nóvember með því að hafa samband við Ólaf í gsm 6987533 eða senda tölvupóst á Kjósarstofu, kjosarstofa@kjos.is og tiltaka hvaða vara verður í boði.. Öðrum en innansveitarfólki verður gefinn kostur á þeim borðum sem verða til ráðstöfunar eftir að frestur rennur út. Kvenfélag Kjósarhrepps verður með veitingasölu til fjáröflunar á markaðnum og jólaföndur verður í boði fyrir börnin.

Íbúar Kjósarhrepps eru hvattir til að nýta sé þetta tækifæri til að koma heimaframleiðslu sinni, handverki og matvælum á framfæri. 

9. nóvember 2011

Plastgámarnir losaðir á laugardaginn

Plastgámarnir verða losaðir á laugardaginn 12. nóvember. Bændur eru vinsamlegast beðnir um að hafa gott aðgengi að þeim. 

9. nóvember 2011

Annir hjá bókverju Kjósarhrepps

Mikið er að gera hjá bókverju Kjósarhrepps þessa dagana en nú streyma inn nýjar bækur á bókasafnið. Að venju verða keypar inn allar helstu skáld - og ævisögur sem eru að koma út, en núna vera einnig keyptar inn nokkrar fræðslubækur og uppflettirit.

Bókasafnið verður opið í dag, miðvikudag 9. nóvember,  frá kl. 15-18.

Markmiðið er síðan að safnið verði opið á tveggja vikna fresti í vetur eins og verið hefur undanfarin ár. 

Næst verður opið 23. nóvember og þá frá kl 20-22, síðan 7. desember frá kl 15-18 og 21. desember frá 20-22.. Íbúar eru hvattir til að nýta sér þessa þjónustu og koma við og ná sér í góða bók að lesa í skammdeginu.

9. nóvember 2011

Ný aðkoma að Félagsgarði

Framkvæmdir við hellulögn framan við Félagsgarð ganga vel og er verkinu að mestu lokið . Heiða Aðalsteinsdóttir landslagsarkitekt frá Eilífsdal hannaði og teiknaði upp nýja hellulögn framan við innganginn í húsið, einnig var útipallurinn endurgerður og stækkaður og tengdur við aðkomuna með tröppum .

Hálstak, Jón Gíslason sá um jarðvegsskipti og Garðmenn Jón Júlíus Elíasson og félagar  sjáu um hleðslu og hellulögnina .

Kvenfélag Kjósarhrepps ákvað síðan á fundi sínum í gærkvöldi að gefa 60-80.000 kr til kaupa á lággróðri í beðin fyirir framan pallinn. 

Sveitunganar eru hér með hvattir til að koma við og skoða nýja útlitið og endilega láta sína skoðun í ljós um verkið.

8. nóvember 2011

Ný stjórn hjá Adam – folaldasýning.

Aðalfundur Adams var haldinn í gærkvöldi, og var hann nokkuð vel sóttur. Alls gengu í félagið 7 nýir félagar og eru félagsmenn nú rúmlega 50 talsins.  Á fundinum var kosin ný stjórn og  er hún þannig skipuð:

Formaður:  Björn Ólafsson, Þúfu.

Meðstjórnendur: Sigurður Guðmundsson, Flekkudal og Óðinn Elísson, Hlíðarási.

Varamenn: Ólöf Ósk Guðmundsdóttir, Miðdal og Orri Snorrason, Morastöðum.

Gert er ráð fyrir að varamenn taki fullan þátt í störfum stjórnar.

Ný stjórn vill þakka fráfarandi formanni Pétri Blöndal og  fyrri stjórnarmönnum fyrir vel unnin störf.

Síðasti vetur var félagsstarfi hestamanna erfiður sökum hestapestar sem gekk yfir.  Nú er bjartara yfir og stefnir Adam í að standa fyrir líflegu félagsstarfi í vetur.

Fyrsta uppákoma vetrarins verður sunnudaginn 4. desember, þegar haldin verður folaldasýning í Boganum á Þúfu. Sýningin verður auglýst nánar síðar.

Hestamenn í Kjós; höfum gaman , saman.

Stjórn Adams.

8. nóvember 2011

Aðalfundur Umhverfisvaktarinnar við Hvalfjörð

"Stjórn Umhverfisvaktarinnar við Hvalfjörð boðar hér með aðalfund félagsins, en hann verður haldinn

þriðjudagskvöldið 15. nóvember n.k. í Kaffi Kjós og hefst kl. 20.

Dagskrá: Venjuleg aðalfundarstörf. Sjá nánar á vef Umhverfisvaktarinnar.

Við hvetjum félagsmenn og aðra sem áhuga hafa á umhverfismálum að mæta, taka með sér gesti

og taka þátt í umræðunni um starf Umhverfisvaktarinnar og verkefni komandi árs.

Nýir félagar eru boðnir velkomnir. Heitt verður á könnunni að hætti Kjósverja."

Með þökk,

stjórn Umhverfisvaktarinnar við Hvalfjörð

2. nóvember 2011

Opinn morgunverðarfundur í Ásgarði um samstarf í Hvalfirði

Miðvikudaginn 9. Nóvember frá 8:20 – 10:30

Aðalefni fundarins verður greining tækifæra í ferðaþjónustu og afleiddum störfum hennar í Hvalfirði. Einnig verður farið yfir tækifæri í samstarfsverkefnum Hvalfjarðarsveitar og Kjósarhrepps. Með okkur á fundinum verður ráðgjafinn Hannes Ottósson frá Impru ásamt Torfa Jóhannessyni frá Vaxtarsamning Vesturlands.

Vinsamlega staðfestið mætingu í síma 437-2214 eða info@vesturland.isfyrir lok mánudaginn 7.nóvember.

Hlökkum til þess að sjá ykkur

31. október 2011

Aðalfundarboð

Aðalfundur hestamannafélagsins Adams verður haldinn í Ásgarði   kl. 20:30, mánudaginn 7. nóvember n.k.  Dagskrá aðalfundar er samkvæmt lögum félagsins. Athygli er vakin á að á fundinum verður kosinn nýr formaður og ný stjórn. Hægt er að kynna sér alla dagskrá fundarins á vefsíðunni:

http://kjos.is/felagasamtok/hestamannafelagid-adam/samthykktir-adams/

Adamsfélagar og aðrir áhugamenn; fjölmennið og takið þátt í skemmtilegum félagsskap.

Stjórn hestamannfélagsins Adam.

31. október 2011

Opnun ljósmyndasýningar og erindi um búorku

Á laugardag var opnuð í Ásgarði sýning á ljósmyndum sem eru afrakstur námskeiðs á vegum Kjósarstofu sem haldið var í sumar þar sem Ragnar Th. Sigurðsson ljósmyndari og Ólafur Oddsson voru leiðbeinendur. Viðfangsefni námskeiðsins var náttúra og saga Kjósarinnar. Sýninguna má skoða á skrifstofutíma hreppsins virka daga.

 Eftir opninuna hélt Kristján Hlynur Ingólfsson fróðlegt erindi um framleiðslu á gasi í sveitum, en meistararitgerð hans í umhverfis- og auðlindafræði ber heitið Búorka og er þar miðlað þekkingu á lífgasvinnslu. Í kjölfar hækkandi verðs á jarðefnaeldsneyti hefur orðið vakning í því að auka innlenda framleiðslu metans. Kristján Hlynur rakkosti þess að setja upp einfalda gasframleiðslu fyrir ver sem samnýtir úrgang frá nokkrum býlum og ræddi um kosti og galla þess að hafa gasframleiðslu á stökum býlum. Miklar umræður spunnust um möguleika Kjósverja til orkuframleiðslu til heimanotkunar. Skoða má ritgerð Kristjáns á vefnum skemman.is. Kynning á verkefninu liggur frammi í Ásgarði.

25. október 2011

Erindi um möguleika bænda til orkuframleiðslu og ljósmyndasýning um náttúru og sögu Kjósarinnar

Kjósarstofa í samstarfi við umhverfis- og landbúnaðarnefnd efnir til  dagskrár í Ásgarði n.k. laugardag, 29. október kl 13-16.

Kristján Hlynur Ingólfsson mun flytja erindi um framleiðslu á gasi í sveitum, en meistararitgerð hans í umhverfis- og auðlindafræði ber heitið Búorka og er þar miðlað þekkingu á lífgasvinnslu. Í kjölfar hækkandi verðs á jarðefnaeldsneyti hefur orðið vakning í því að auka innlenda framleiðslu metans. Kristján Hlynur rekur kosti þess að setja upp einfalda gasframleiðslu fyrir ver sem samnýtir úrgang frá nokkrum býlum og ræðir um kosti og galla þess að hafa gasframleiðslu á stökum býlum. Erindið hefst kl. 14.

Ljósmyndasýning

Kl. 13 verður opnuð í Ásgarði sýning á ljósmyndum sem eru afrakstur námskeiðs á vegum Kjósarstofu sem haldið var í sumar þar sem Ragnar Th. Sigurðsson ljósmyndari og Ólafur Oddsson voru leiðbeinendur. Viðfangsefni námskeiðsins var náttúra og saga Kjósarinnar.

Boðið verður upp á kaffi og meðlæti.

20. október 2011

Hryssan fundin

Hryssan sem auglýst eftir fyrr á síðunni er fundin. Hún fannst föst í pytti og var blessunarlega enn á lífi en nokkuð af henni dregið.  

19. október 2011

Hryssa hefur tapast

Jarpskjótt, sokkótt, fimm vetra hryssa finnst ekki lengur í þeirri girðingu sem hún átti að vera í,  í landi Blöndholts.  Hún er með dökkt tagl og fax og fléttur í faxi, dauðspök og örmerkt.

Þeir sem kunna að hafa orðið varir við hryssuna eru vinsamlegast beðnir að hafa samband við Elísabetu í gsm 8635361 og 6989945.

18. október 2011

Námskeið fræðsla fyrir sveitarstjórnarfólk.

Hreppsnefnd Kjósarhrepps ákvað á síðasta ári í samvinnu við Hvalfjarðarsveit að halda námskeið– fræðslu fyrir  sveitarstjórnafólk í nefndum og ráðum sveitarfélaganna.

Magnús Karel Hannesson hjá Sambandi íslenskra sveitarfélaga mun halda námskeiðið og verður það haldið fimmtudaginn 27.október nk. kl. 15.00 að Innrimel 3,  Hvalfjarðarsveit.

Mikilvægt er að þeir sem hafa verið kosnir eða skipaðir í þessar nefndir og ráð á vegum sveitarfélaganna sjái sér fært að mæta, en Magnús mun fara yfir helstu lög og reglur sem sveitarstjórnarfólki ber að fara eftir í störfum sínum fyrir sveitarfélögin.

Vinsamlegast skráið ykkur hjá Laufeyju Jóhannsdóttur laufey@hvalfjardarsveit.is   eða Sigrúnu Mjöll  sigrun.mjoll@hvalfjardarsveit.is

18. október 2011

Hreppsnefndarfundur, fimmtudaginn 20. október

Hreppsnefndarfundur verður á fimmtudaginn 20. október í Ásgarði og hefst kl 13.

Dagskrá fundarins er að finna undir stjórnsýslan, hreppsnefnd, fundir hreppsnefndar. 

10. október 2011

Einn rólegur í sunnudagssteikinni

Stæðilegur hvítur refur var á ferð um Miðdalinn í gærdag og fann þar hina bestu sunnudagsmáltíð. 

Þarna er hann sestur að mat sínum og var hinn rólegasti góða stund, hélt áfram að éta eins og ekkert hefði í skorist og nógu lengi til þess að hægt væri ná í myndavélina og taka af honum nokkrar myndir.

10. október 2011

Fjölmenni á Krásum í Kjósinni

Matarmenningarhátíðin Krásir í Kjósinni var haldin í fyrsta sinn á laugardag í Félagsgarði og þótti takast mjög vel. Hátíðin var sótt af um 100 manns og þar voru kynnt matvæli og hráefni frá alls 14 aðilum í Kjósinni sem meistarakokkarnir Ólöf Jakobsdóttir og Jakob H Magnússon matreiddu af einstöku listfengi. Halldór Pálmar Halldórsson og Óskar Sindri Gíslason líffræðingar stóðu fyrir kynningu á grjótkrabba sem var jafnframt á matseðlinum. Dominique Plédel Jónsson kynnti lífræn vín og Slowfood, alþjóðleg samtök til verndar staðbundnum mat og