Folaldasýning Adams - úrslit
Flest verðlaun sýningarinnar 2020 runnu til hrossaræktendanna á Meðalfelli
Folaldasýning Adams
Minnsta hestamannafélagið á landinu, Hestamannafélagið Adam í Kjós, hélt fyrsta almenna hestaviðburð ársins hér á landi þann 12. janúar 2020, þegar folaldasýning félagsins fór fram í Miðdal í Kjós. Oft veltur lítil þúfa þungu hlassi. Árið 2020 verður gott ár fyrir íslenska hestinn. Eins og oft áður voru fengnir til dómstarfa þeir Þorvaldur Kristjánsson, ábyrgðarmaður í hrossarækt o.fl., og Halldór Guðjónsson, sem er kunnur hestamaður í Dallandi.
Á sýninguna mættu með folöld sín félagar í hestamannafélaginu, hrossaræktendur í Kjósinni og nágrannasveitarfélögum. Verðlaunað var fyrir fyrstu þrjú sæti í flokki hestfolalda og flokki merfolalda og dæmt var um glæsilegasta folald sýningarinnar í eigu félagsmanns í Adam. Fjöldi gesta mætti á sýninguna, sem fór fram í frábærri aðstöðu hjá Miðdalshjónunum Svönu og Guðmundi.
Glæsilegasta folald sýningarinnar var kosið Mjallhvít frá Þúfu, sem er í eigu Guðríðar Gunnarsdóttur og Björns Ólafssonar, sem lengi hafa kennt hrossarækt sína við Þúfu í Kjós. Mjallhvít var jafnframt hæst dæmda merfolaldið. Hæst dæmda hestfolaldið var Skuggi frá Flekkudal, sem er í eigu Guðnýjar G. Ívarsdóttur, sem ásamt Sigurði Guðmundssyni kennir hrossarækt sína við Flekkudal í Kjós. Húsráðendurnir Svanborg Magnúsdóttir og Guðmundur Davíðsson, Miðdal í Kjós, áttu merfolald í öðru sæti. Flest verðlaun sýningarinnar runnu þó til hrossaræktendanna á Meðalfelli í Kjós, þeirra Sigurbjargar Ólafsdóttur og Sigurþórs Gíslasonar, sem áttu merfolald í þriðja sæti og hestfolöld í öðru og þriðja sæti.
Úrslit sýningarinnar voru þessi:
Merfolöld:
1. Mjallhvít frá Þúfu. Móðir: Þyrnirós frá Þúfu. Faðir: Herkúles frá Ragnheiðarstöðum.
Eigendur og ræktendur: Guðríður Gunnarsdóttir og Björn Ólafsson.
2. Sólstaða frá Miðdal. Móðir: Ská frá Miðdal. Faðir: Aðall frá Nýja-bæ.
Eigendur og ræktendur: Svanborg Magnúsdóttir og Guðmundur Davíðsson.
3. Eik frá Meðalfelli. Móðir: Nípa frá Meðalfelli. Faðir: Sproti frá Innri-Skeljabrekku.
Eigendur og ræktendur: Sigurbjörg Ólafsdóttir og Sigurþór Gíslason.
Hestfolöld:
1. Skuggi frá Flekkudal. Móðir: Ól frá Flekkudal. Faðir: Skugga-Sveinn frá Þjóðólfshaga.
Eigandi og ræktandi: Guðný G. Ívarsdóttir.
2. Dynjandi frá Meðalfelli. Móðir: Dagný frá Meðalfelli: Faðir: Hávaði frá Haukholtum.
Eigendur og ræktendur: Sigurbjörg Ólafsdóttir og Sigurþór Gíslason.
3. Krókur frá Meðalfelli. Móðir: Klækja frá Stóra-Kroppi. Faðir: Sólon frá Heimahaga.
Eigendur og ræktendur: Sigurbjörg Ólafsdóttir og Sigurþór Gíslason.