Skipulags- umhverfis og samgöngunefnd

Lagt er fram að nýju uppfært deiliskipulag fyrir Sandslund 16, 26 og Sandstanga, sem áður var til umfjöllunar á fundi nefndarinnar þann 29.01.2026. Með hliðsjón af þeim athugasemdum sem þá voru gerðar, hefur hönnuður nú breytt tillögunni og tekið tillit til ábendinga nefndarinnar er varða útfærslu á lóðinni Sóltún 1.

Tekin er fyrir breyting á deiliskipulagi fyrir lóðina Eyjatún 27, en tillagan var grenndarkynnt í samræmi við samþykkt nefndarinnar frá 30.04.2026, sbr. 2. mgr. 43. gr. skipulagslaga nr. 123/2010. Tvær athugasemdir bárust á kynningartíma.



Nefndin hefur yfirfarið framkomnar athugasemdir. Þar sem ekki eru færð fram efnisleg rök eða upplýsingar sem sýna fram á að breytingin hafi neikvæð áhrif á lögvarða hagsmuni athugasemdaraðila eða að hún fari gegn markmiðum skipulagslaga gefa athugasemdirnar ekki tilefni til breytinga á tillögunni.

Tekin er fyrir tillaga að breytingu á deiliskipulagi ásamt merkjalýsingu er lýtur að sameiningu lóðanna Eyjavíkur 6, 12 og 16 í eina 5.767,9 m² lóð undir heitinu Eyjavík 6 (L198314). Tillagan hefur verið grenndarkynnt fyrir lóðarhöfum aðliggjandi lóða í samræmi við 2. mgr. 43. gr. skipulagslaga nr. 123/2010 og bárust engar athugasemdir.

Tekin er fyrir að nýju breyting á deiliskipulagi fyrir Brekkur 8 eftir grenndarkynningu skv. 2. mgr. 43. gr. skipulagslaga nr. 123/2010. Nefndin hefur yfirfarið þær umsagnir sem bárust og gefa þær ekki tilefni til breytinga á deiliskipulagsuppdrætti dags. 24.04.2026.



Umsögn Vegagerðarinnar var tekin til sérstakrar skoðunar. Þar sem fyrirhuguð bygging er frístandandi bílskúr en ekki íbúðar- eða sumarhús, telur nefndin ekki tilefni til breytinga á uppdrætti. Líkt og fram kom á 32. fundi nefndarinnar er gildi þessarar deiliskipulagsbreytingar háð undanþágu umhverfis-, orku- og loftslagsráðherra frá d-lið gr. 5.3.2.5. í skipulagsreglugerð nr. 90/2013 (vegna byggingarlínu við þjóðvegi).

Lögð er fyrir umsókn Adam Hoffritz fyrir hönd landeiganda um stofnun nýrrar lóðar úr landi Neðra-Háls L126452. Nýja lóðin mun heita Langás 7. Lóðin verður 3500,2 m2. Aðkoma verður frá Langásvegi. Engin mannvirki verða á nýrri landeign við stofnun hennar. Á svæðinu er í gildi deiliskipulag fyrir sumarhúsabyggð í landi Neðra-Háls frá 1995. Nýja lóðin, Langás 7, er líklega á mörkum þess svæðis sem er merkt sem Langás 5 annars vegar og Ú2 hins vegar þar sem gert er ráð fyrir frístundalóð og er byggingareitur á lóðinni.

Lögð er fyrir umsókn Andrea Fiocca um byggingarheimild dags. 04.06.26 á 15,4 m2 viðbyggingu mhl. 01 við 41,8 m2 sumarbústað sem og byggingarheimild fyrir 20,0 m2 nýbyggingu mhl. 02. Lóðin Hlíð 39 L126248 er 5213 m2 og er því byggingarmagn innan heimilda aðalskipulags og nýtingarhlutfall 0,01.

Lögð er fram byggingarleyfisumsókn Einbúa fasteignum ehf. vegna byggingar 134,0 m² frístundahúss mhl 01 og annarsvegar heimildar til niðurrifs 40,8 m² frístundahúss sem byggt var árið 1978 á lóðinni Hamrar 12, L126210. Lóðin er skráð 3.515 m² að stærð. Veðbókarvottorð fyrir niðurrifi hefur verið lagt fram. Vegna lögunar lóðarinnar, sem er um 35 m á breidd, reynist erfitt að uppfylla kröfu um 10 m fjarlægð frá lóðarmörkum beggja megin.

Lögð er fyrir byggingarleyfisumsókn Hálstaks ehf. á þegar byggðri 112,2 m2 tækjageymslu á lóðinni Baulubrekka L205213. Fyrir er á lóðinni 178,7 m2 íbúðarhús er heildarbyggingarmagn því 290,9 m2. Hámarksbyggingarmagn lóðar samkvæmt deiliskipulagi er 350 m2.

Skipulags- umhverfis og samgöngunefnd vekur athygli á því að byggingarfulltrúa er heimilt að leggja stjórnvaldssekt á framkvæmdir sem eru byggingarleyfisskyldar án þess að hafa fengið byggingarleyfi skv. 9. gr. laga um mannvirki nr. 160/2010.

Tekið er fyrir erindi byggingarfulltrúa vegna lóðarinnar Eyjatúns 18, L211596. Þrátt fyrir ítrekuð tilmæli hefur eigandi ekki brugðist við kröfu um að fjarlægja þær leifar byggingar sem standa enn eftir í kjölfar foktjóns árið 2023.

Byggingarfulltrúi óskar eftir samþykki nefndarinnar fyrir því að gripið verði til aðgerða við að fjarlægja leifar byggingarinnar á kostnað eiganda lóðarinnar, með vísan til 2.9.2. gr. byggingarreglugerðar.