Skipulags- umhverfis og samgöngunefnd

Lögð er fram að nýju tillaga að deiliskipulagi fyrir Sandslund 16, Sandslund 26 og Sandstanga að lokinni endurauglýsingu. Deiliskipulagið nær yfir lóðirnar Sandstanga L237218, Sandslund 16 L215846 og að hluta Sandslund 26 L215944. Innan skipulagssvæðisins er gert ráð fyrir samtals 14 lóðum á bilinu 3000 - 5141 m2.



Tillagan var áður auglýst frá 12. desember 2025 til 23. janúar 2026. Við yfirferð málsins kom í ljós að auglýsing tillögunnar hafði ekki birst í Lögbirtingablaðinu og var hún því auglýst að nýju í samræmi við 1. mgr. 41. gr. skipulagslaga nr. 123/2010. Engar nýjar umsagnir eða athugasemdir bárust á endurauglýsingartíma.



Tillagan var áður tekin til afgreiðslu á fundi nefndarinnar þann 25. júní 2026, eftir að hönnuður hafði uppfært hana með hliðsjón af framkomnum athugasemdum og ábendingum nefndarinnar varðandi útfærslu lóðarinnar Sóltúns 1.

Lögð er fram að nýju tillaga, dags. 21. maí 2026, að breytingu á deiliskipulagi Eyrar í Kjósarhreppi að lokinni grenndarkynningu. Breytingin tekur til lóðanna Miðbúðar 1-7 og felur í sér viðbót við byggingarskilmála í greinargerð deiliskipulagsins, nánar tiltekið nýjan kafla 4.6 um íbúðarhús. Skipulagsuppdráttur helst óbreyttur.



Tillagan var grenndarkynnt frá 8. júní til og með 6. júlí 2026 í samræmi við 2. mgr. 43. gr. skipulagslaga nr. 123/2010. Engar athugasemdir bárust á kynningartíma.

Lögð er fram að nýju tillaga, dags. 25. maí 2026, að breytingu á deiliskipulagi frístundabyggðar í landi Brekkna að lokinni grenndarkynningu. Breytingin tekur til lóðanna Brekkna 1, L204481, og Brekkna 2, L204482, og felur í sér að hámarksbyggingarmagn á hvorri lóð hækkar úr 200 m² í 250 m². Nýtingarhlutfallið 0,03 og aðrir skilmálar deiliskipulagsins haldast óbreyttir.



Tillagan var grenndarkynnt frá 8. júní til og með 6. júlí 2026 í samræmi við 2. mgr. 43. gr. skipulagslaga nr. 123/2010. Ein athugasemd barst frá eigendum Brekkna 3, L204483. Þar er auknu byggingarmagni mótmælt með vísan til umfangs mögulegrar uppbyggingar og áhrifa hennar á Brekkur 3. Jafnframt er gerð athugasemd við að Brekkur 1 og 2 njóti rýmri byggingarheimilda á meðan ósk um að Brekkur 3 verði breytt í íbúðarlóð hafi verið hafnað.



Skipulags-, umhverfis- og samgöngunefnd hefur farið yfir athugasemdina. Nefndin bendir á að Brekkur 1 og 2 eru þegar skilgreindar sem íbúðarhúsalóðir á íbúðarsvæði ÍB5b samkvæmt gildandi skipulagsáætlunum, en Brekkur 3 er áfram frístundalóð. Lóðirnar eru því ekki í sömu skipulagslegu stöðu hvað varðar landnotkun og byggingarheimildir. Fyrirliggjandi breyting felur hvorki í sér stofnun lögbýla né breytingu á landnotkun lóðanna, heldur einungis hækkun á heimiluðu hámarksbyggingarmagni um 50 m² á hvorri lóð.



Byggingarreitir, nýtingarhlutfall, húsahæðir, aðkoma og aðrir skilmálar deiliskipulagsins haldast óbreyttir. Að mati nefndarinnar er aukning byggingarheimilda því ekki líkleg til að hafa slík áhrif á aðliggjandi lóðir að tilefni sé til að hafna breytingunni. Afstaða til hugsanlegrar breytingar á landnotkun eða skráningu Brekkna 3 verður ekki tekin í þessu máli, enda tekur deiliskipulagsbreytingin ekki til þeirrar lóðar. Slíkt erindi þarf að fá sjálfstæða málsmeðferð með hliðsjón af gildandi aðal- og deiliskipulagi.

Lögð er fram uppfærð tillaga að nýju deiliskipulagi fyrir íbúðarbyggð í landi Álfakots, L224886, dagsett 28. ágúst 2026, ásamt fyrirliggjandi umsögnum og viðbrögðum við þeim.

Lögð er fram að nýju umsókn eigenda Eyjavíkur 6, L198314, um breytingu á skráningu og hnitsetningu lóðarinnar í kjölfar sameiningar landeigna. Málið var áður tekið fyrir á fundi Skipulags-, umhverfis- og samgöngunefndar 25. júní 2026.

Jafnframt eru lögð fram erindi eigenda Eyjavíkur 4, þar á meðal fyrri tölvupóstur Jónasar Jónatanssonar og síðari tölvupóstur með athugasemdum við fyrirhugaða hnitsetningu og mælingu hinnar sameinuðu lóðar, sem og við orðalag fyrri bókunar nefndarinnar.

Málið er því tekið fyrir að nýju til að skýra hvort fyrirhuguð skráningarbreyting feli eingöngu í sér hnitsetningu fyrirliggjandi og óbreyttra marka eða hvort hún taki til marka sem óvissa eða ágreiningur er um. Jafnframt þarf að afmarka skýrt að afgreiðsla sveitarfélagsins felur ekki í sér úrlausn um einkaréttarlegan ágreining eða eignarrétt að landi.

Lögð er fram umsókn Lárusar Vilhjálmssonar og Ragnhildar Jónsdóttur, dags. 14. ágúst 2026, um framkvæmdaleyfi vegna borunar eftir neysluvatni í landi Álfakots L224886. Fyrirhuguð er um 40 m djúp borhola með 6 tommu fóðurröri og dælu. Borholunni er ætlað að þjóna núverandi íbúðarhúsi á Álfakoti 1 og fyrirhuguðum íbúðarhúsum á lóðum Álfakots 2-6.



Samkvæmt umsókn er borholan fyrirhuguð innan Álfakots 1, um 25 m frá Eyrarkotsvegi og um 10 m frá heimreið og íbúðarhúsi.



Nefndin bendir á að tillaga að deiliskipulagi Álfakots, mál nr. 2603020, er enn til meðferðar. Í auglýstri deiliskipulagstillögu er gert ráð fyrir að neysluvatn komi úr sameiginlegu vatnsbóli Eyri, Eyrarkots og Álfakots. Fyrirhuguð borhola felur því í sér breytingu á forsendum tillögunnar. Gera þarf grein fyrir borholunni, lagnaleiðum og vatnsverndarsvæðum í uppfærðu deiliskipulagi.

Lögð er fyrir umsókn um stofnun nýrrar lóðar úr landi Miðdals L126371. Nýja lóðin mun heita Miðdalur 5 og verður íbúðarhúsalóð á 10.482,3 m². Aðkoma verður frá Eyrarfjallsvegi. Engin mannvirki verða á nýrri landeign við stofnun hennar. Um er að ræða staka framkvæmd á landbúnaðarlandi. Fyrir hafa verið stofnaðar tvær íbúðarhúsalóðir úr landi Miðdals. Kvöð er á Miðdal að hindra ekki aðkomu að miðdal 5.

Lögð er fyrir umsókn um stofnun íbúðarhúsalóðar úr landi Þúfu (L126493). Hin nýja lóð mun bera heitið Lækjarbær og verður 22.536 m² að stærð. Aðkoma að lóðinni verður frá Eyrarfjallsvegi (460). Engin mannvirki verða innan lóðarinnar við stofnun hennar. Við afmörkun fyrirhugaðs byggingarreits hefur verið tekið tillit til landbúnaðarlands og er hann staðsettur á landi sem ekki telst gott ræktunarland.

Lögð er fyrir byggingarleyfisumsókn vegna breytinga innanhúss á íbúðarhúsi Þúfu L126493. Búið er að ganga frá útisvæði, palli, heitum potti, útisturtu og eldstæði.Eigandi hefur hug á að sækja um gistileyfi í húsnæðinu. Því hefur upplýsingum um flóttaleiðir, brunavarnir og hjólastólaaðgengi verið bætt inn á teikningu.

Tekin er fyrir að nýju umsókn um byggingarleyfi vegna breyttra byggingaráforma að Stóru-Skál, L211010. Umsóknin var áður tekin fyrir á fundi nefndarinnar 31. maí 2023 og afgreiðslu hennar frestað.



Samkvæmt uppdráttum sem bárust 11. ágúst 2026, dagsettum 11. maí 2023, er íbúðarhús, mhl. 01, 218,7 m² og bílskúr, mhl. 02, 104,0 m². Heildarbyggingarmagn samkvæmt uppdráttunum er því 322,7 m².



Áður samþykkt byggingaráform, sem Skipulags- og byggingarnefnd samþykkti 26. ágúst 2021 með fyrirvara um grenndarkynningu án athugasemda, gerðu ráð fyrir 191,8 m² íbúðarhúsi, mhl. 01, og 80,0 m² bílskúr, mhl. 02, samtals 271,8 m². Grenndarkynning fór fram árið 2021 og bárust engar athugasemdir.



Breytingin frá áður samþykktum áformum er 50,9 m² samtals: íbúðarhúsið stækkar um 26,9 m² og bílskúrinn um 24,0 m².



Skráð stærð lóðarinnar er 2.000 m². Ósamræmi er hins vegar í framlögðum gögnum um stærð hennar, þar sem í greinargerð hönnuðar er hún tilgreind 5.910,0 m² en á afstöðumynd 4,6 ha.

Lögð er fram umsókn Níels Steinars Jónssonar um byggingarleyfi fyrir 82,2 m² geymsluhúsi, mhl. 03, á íbúðarhúsalóðinni Lyngholti, L213971. Lóðin er 5.300 m² að stærð. Ekki er í gildi deiliskipulag á svæðinu.



Fyrir eru á lóðinni 103,6 m² íbúðarhús, mhl. 01, og 25,3 m² bílskúr, mhl. 02. Heildarbyggingarmagn á lóðinni verður 211,1 m² og nýtingarhlutfall því 0,04.

Óskað er eftir afstöðu nefndarinnar til endurbyggingar fjögurra samliggjandi bátaskýla. Gömlu skýlin hafa þegar verið rifin vegna mikils fúa og bágs ástands. Ástand þeirra var orðið þannig að hætta gat stafað af, meðal annars vegna mögulegs foks.



Fyrirhugað er að reisa ný skýli á sama stað og þau gömlu stóðu. Markmiðið er að endurgerðin verði eins nærri upprunalegu útliti skýlanna og unnt er og falli vel að þeim bátaskýlum sem enn standa á svæðinu.

Lagt er fram erindi Húsnæðis-, mannvirkja- og skipulagsstofnunar þar sem óskað er umsagnar Kjósarhrepps um matsskyldu fyrirhugaðs hænsnabús Matfugls ehf. að Tindstöðum í Miðdal, sbr. mál nr. 0936/2026 í Skipulagsgátt. Jafnframt eru lögð fram drög að umsögn Kjósarhrepps, dags. 20. ágúst 2026.



Fyrirhuguð framkvæmd felur í sér allt að 10.000 m² uppbyggingu og eldisaðstöðu fyrir allt að 39.900 stofnfugla, auk fóðursílóa, þjónustu- og athafnasvæða og tengdra innviða. Aðkoma að framkvæmdarsvæðinu verður um Eyrarfjallsveg og brú yfir Kiðafellsá innan Kjósarhrepps.



Skipulags-, umhverfis- og samgöngunefnd telur framkvæmdina líklega til að hafa umtalsverð umhverfisáhrif vegna umfangs, eðlis og staðsetningar hennar. Áhrifin verða að verulegu leyti innan Kjósarhrepps og taka meðal annars til íbúa og byggðar við Morastaði, umferðar og umferðaröryggis, burðarþols vegar og brúar, vetrarþjónustu, lyktar og loftgæða, hávaða, landslags og ásýndar, vatnsöflunar, frárennslis, meðhöndlunar húsdýraáburðar, útivistar og ferðaþjónustu.



Nefndin áréttar fyrri afstöðu Kjósarhrepps frá 6. mars 2024 og telur að fyrirliggjandi gögn hafi ekki sýnt fram á að framangreind áhrif verði óveruleg eða að fullnægjandi og bindandi lausnir liggi fyrir vegna innviða og þjónustu.

Lögð er fram skipulagslýsing Sei ehf., dags. í ágúst 2026, vegna gerðar nýs deiliskipulags fyrir áfangastaðinn Þórufoss í Kjósarhreppi.



Skipulagssvæðið er um 2,5 ha og er innan afþreyingar- og ferðamannasvæðis AF5 samkvæmt Aðalskipulagi Kjósarhrepps 2017?2029. Markmið skipulagsgerðarinnar er að bæta aðgengi og öryggi ferðamanna, vernda náttúru og landslag og draga úr raski vegna aukinnar umferðar. Meðal annars er gert ráð fyrir bílastæðum fyrir fólksbíla, rútur og bíla með eftirvagna, gönguleiðum, dvalarsvæðum og útsýnisaðstöðu.



Skipulags-, umhverfis- og samgöngunefnd tekur jákvætt í fyrirliggjandi skipulagslýsingu og leggur til við sveitarstjórn að hún verði samþykkt til kynningar samkvæmt 1. og 3. mgr. 40. gr. skipulagslaga nr. 123/2010, með eftirfarandi lagfæringum:



*
Tilvísun til 30 m fjarlægðar frá ám og vötnum verði samræmd 50 m fjarlægðarviðmiði gr. 5.3.2.14 í skipulagsreglugerð nr. 90/2013. Verði fyrirhuguð mannvirki innan þeirra marka þarf að gera sérstaklega grein fyrir lagagrundvelli, nauðsyn, valkostum og umhverfisáhrifum.



*
Gerð verði skýr grein fyrir sérstakri vernd Þórufoss og nánasta umhverfis hans samkvæmt 61. gr. náttúruverndarlaga nr. 60/2013 og vernd bakkagróðurs samkvæmt 62. gr. sömu laga.



*
Umfjöllun um friðhelgun fornleifa verði samræmd lögum um menningarminjar nr. 80/2012.



*
Ekki verði fullyrt á þessu stigi að skipulagið hafi óveruleg umhverfisáhrif eða sé ekki háð umhverfismati. Í deiliskipulagsvinnunni verði lagt mat á áhrif á náttúru, landslag, ásýnd Þórufoss, vatnalíf og vatnshlot Laxár, bakkagróður, umferð, öryggi, aðgengi og menningarminjar.



*
Umfang fyrirhugaðra mannvirkja og aðstöðu verði skýrt nánar, meðal annars varðandi útsýnispalla, skjól, girðingar, lýsingu, skilti, úrgangsmál, yfirborðsvatn og eftir atvikum snyrtiaðstöðu.

HMS hefur þróað sameiginlegt umsóknar- og umsýslukerfi fyrir byggingarleyfi sem sveitarfélög eiga að innleiða fyrir árslok 2026. Umsóknir til Kjósarhrepps munu berast í gegnum byggingarleyfi.hms.is en ábyrgð á leyfisveitingu og málsmeðferð verður áfram hjá sveitarfélaginu. Tengja þarf kerfið við málaskrárkerfi Kjósarhrepps og er virkur Straumur (X-Road) forsenda þeirrar tengingar. HMS ber kostnað af sameiginlega kerfinu en Kjósarhreppur af tengingu og nauðsynlegri aðlögun eigin kerfa.



Nauðsynlegar aðgerðir:



Kjósarhreppur þarf að undirbúa innleiðingu byggingarleyfakerfis HMS með því að tilnefna ábyrgðarmann og hafa samband við HMS um framkvæmd og tímasetningu. Staðfesta þarf að Straumur (X-Road) sé virkur og láta tengja nýja kerfið við málaskrárkerfi sveitarfélagsins.



Jafnframt þarf að ákveða hvernig gögn verða skráð og varðveitt, skilgreina aðganga starfsmanna og uppfæra verkferla. Áður en kerfið verður tekið í notkun þarf að prófa allt umsóknar- og afgreiðsluferlið, þjálfa starfsfólk og upplýsa umsækjendur um nýja umsóknarleið.



Að lokum þarf að ákveða gangsetningardag og fylgja fyrstu umsóknum sérstaklega eftir.